भिलवडीमध्ये आपले स्वागत आहे ...

भिलवडी हे सांगली जिल्ह्यातील एक महत्वाचे प्रगतशिल गाव आहे. भिलवडीस ऐतिहासिक, सामाजिक, शैक्षिणक परंपरा लाभली आहे. १९३९ साली झालेल्या  वैयक्तिक सत्याग्रहमुळे भिलवडी गाव इतिहासात अजरामर जाले. तसेच स्वातंत्र्य लड्यामधे  येथील स्वातंत्र्य सैनिकांनी महत्वाची भूमिका बजावली आहे. अश्या रितीने स्वातंत्र्यलड्यामधे महत्वपूर्ण भूमिका पार पाडणारा व ऐतिहासिक पार्श्वभूमी असलेल्या या भिलवडी गावाचा विकास स्वातंत्र्या नंतर झाला. त्याचाच परिणाम म्हणून सामाजिक व आर्थिक, राजकीय, शैक्षणिक बदल या गावात घडून आले. भिलवडी हे गाव सांगली जिल्ह्यातील  एक महत्वात्चे गाव असल्याने सांगली जिल्ह्यात हे गाव प्रसिद्ध आहे. भिलवडी हे सांगली पासून २५किमी अंतरावर व भिलवडी स्टेशन पासून पश्चिमेस ३.५किमि अंतरावर आहे. भिलवडीचे उत्तर अक्षांश १६°५९'१९.७६" व पूर्व रेखांश ७४°२८'१०.९५" इतके आहे. भिलवडी गावाचे एकुण क्षेत्र २.३९२ हेक्टर इतके आहे. भिलवडी गावातून कृष्ण नदी वाहते. गावाची पूर्वपश्चिम लांबी २३०० फुट व दक्षिणोत्तर रुंदी २००० फुट आहे. पूर्वेकडून पश्चिमेकडे उतार आहे. या गावाखाली सभोवार १२ वाडया आहेत. त्यापैकी ८ वाडयाना वस्ति असून बाकी सर्व नष्ट झाल्या आहेत.  

भिलवडीला प्राचीन इतिहास आहे. गुरुचरित्र ग्रंथात भिलवडीचा  उल्लेख आढळून येतो. मध्ययुगीन काळी भिलवडीवर विजापुरकरांचे वर्चस्व होते. सन १६७३ मध्ये शिवाजी महाराजांनी हा प्रदेश काबीज केला. सन १६७४ ,मध्ये शिवाजी महाराजांचा राज्याभिषेक झाला त्यावेळी या भागावर मराठ्यांचे वर्चस्व होते.  भिलवडीला खरे महत्व पेशवे काळात आले होते. त्याचे महत्वाचे कारण म्हणजे सन १७७९ मध्ये परशुराम भाऊ पटवर्धन यांनी कृष्णा नदीवरील बांधलेला घाट. या घाटाने २३३ वर्षे पूर्ण केली आहेत. वास्तुशिल्पाचा वैशिष्ट्य पूर्ण नमुना असलेला असा हा घाट कृष्णेच्या उगमापासून कोठेही आढळत नाही.

भिलवडीचा विकास होण्यामध्ये राजकीय नेतृत्वाबरोबरच ग्रामपंचायतीच्या सहभागाचाही विशेष उल्लेख करावा लागेल. विविध शासकीय योजना राबविण्यात ग्रामपंचायतीचे योगदान दिसून येते. ग्रामपंचायतीच्या कार्यामुळेच भिलवडीस विविध योजनांमध्ये पुरस्कार मिळाले आहेत. भिलवडी गावास संत गाडगेबाबा स्वच्छता पुरस्कार, निर्मलग्राम पुरस्कार, दलित योजना सुधारणा पुरस्कार मिळाले आहेत.